INATSISARTUNI
Partii Inuit
Randi Broberg
UPA 2014/134-1
20.5.2014
PILLUGU:
Pilersaarutit annertuut sanaartornerisa nalaanni nunanit allamiut
najugaqalernissamut sulinissamullu akuerineqarsinnaanerat pillugu Kalaallit
Nunaannut Inatsisip Kalaallit Nunaannut atuutilernissaa pillugu
oqaaseqaateqarnissamut Inatsisartut aalajangiinissaanut siunnersuut.
(Inuussutissarsiornermut Aatsitassanullu Naalakkersuisoq)
Siunnersuutikkut Naalakkersuisut ujartorpaat, Suliniutit annertuut aallartisarnerini suliassat
pillugit Inatsisartut inatsisaat nr. 25, 2012’imeersup,
pingaartumillu taassuma allannguutai nr.
13, 2013’imeersup suliartortut qanoq
atugassaqartinneqarnerinut aalajangersakkat
atortuulersinneqarnissaat.
Partii Inuit tikkuarusutagut makkuupput:
1. Siunnersuutip qulequtaani oqaatsip
“najugaqalernissamut”
atorneqartup
paatsuunganarnera peqqutigalugu, tulluarsorinanngilaq. Oqaaseq atugassatut
tulluartitarput tassaavoq “najugaqarallarnissamut”. Tassuunakkut
atuarneqarsinnaammat piffissakkut killilikkamik akuersissuteqartoqarnera.
2. Maluginiagassaavoq pisuussutitta uumaatsut qallorneqarnerini, isertitassatut
isumalluutit tassaanerummata, sulisut isertitaasa akileraarusersornerisigut
isertinneqarsinnaasut.
Tamannarpiaavoq Partii Inuit illuatungerluinnaanut saatittariaqartutut isigisarput.
Aatsitassarsiorneq ingerlanneqartariaqarpoq inuiattut uagutsinnut qallikkut ilorlikkullu
pissarsiviunerpaasussaq tunaartaralugu.
Tamannalu pisinnaavoq naqqaniit aallartittumik, uagut namminerpiaq piginnaasagut
aallaavigalugit aatsitassarsiornerup inerisarneragut, taamalu pisuussutitta uagutsinnut
iluaqutissanngortinneragut. Ullumikkutut inortuilersutut pissusilersunngikkaluarluta.
3. Najugaqarallarnissamut sulinissamullu siunissami akuersissutaasartussat
eqqarsaatigalugit, ullumikkumut misilittakkatta takutereerpaat, avataaniit suliartortut
killilersimaarneqarnissaannik inatsisilluunniip eqqortinneqannginnera ulloq manna
tikillugu pisoq. Taannaannarluunniit eqqortissinnaanatigu, qanoq uani
nakkutiginnittoqarniarami?
1